స్తోత్రాలు 8.॥ ఉపమన్యుకృతశివస్తోత్రమ్ ॥
॥ ఉపమన్యుకృతశివస్తోత్రమ్ ॥
॥ ఉపమన్యుకృతశివస్తోత్రమ్ ॥ శ్రీగణేశాయ నమః । జయ శఙ్కర పార్వతీపతే మృడ శమ్భో శశిఖణ్డమణ్దన । మదనాన్తక భక్తవత్సల ప్రియకైలాస దయాసుధామ్బుధే ॥ ౧॥ సదుపాయకథాస్వపణ్డితో హృదయే దుఃఖశరేణ ఖణ్డితః । శశిఖణ్డశిఖణ్డమణ్డనం శరణం యామి శరణ్యమీశ్వరమ్ ॥ ౨॥ మహతః పరితః ప్రసర్పతస్తమసో దర్శనభేదినో భిదే । దిననాథ ఇవ స్వతేజసా హృదయవ్యోమ్ని మనాగుదేహి నః ॥ ౩॥ న వయం తవ చర్మచక్షుషా పదవీమప్యుపవీక్షితుం క్షమాః । కృపయాఽభయదేన చక్షుషా సకలేనేశ విలోకయాశు నః ॥ ౪॥ త్వదనుస్మృతిరేవ పావనీ స్తుతియుక్తా న హి వక్తుమీశ సా । మధురం హి పయః స్వభావతో నను కిదృక్సితశర్కరాన్వితమ్ ॥ ౫॥ సవిషోఽప్యమృతాయతే భవాఞ్ఛవముణ్డాభరణోఽపి పావనః । భవ ఏవ భవాన్తకః సతాం సమదృష్టిర్విషమేక్షణోఽపి సన్ ॥ ౬॥ అపి శూలధరో సతాం నిరామయో దృఢవైరాగ్యరతోఽపి రాగవాన్ । అపి భైక్ష్యచరో మహేశ్వరశ్చరితం చిత్రమిదం హి తే ప్రభో ॥ ౭॥ వితరత్యభివాఞ్ఛితం దృశా పరిదృష్టః కిల కల్పపాదపః । హృదయే స్మృత ఏవ ధీమతే నమతేఽభీష్టఫలప్రదో భవాన్ ॥ ౮॥ సహసైవ భుజఙ్గపాశవాన్వినిగృహ్ణాతి న యావదన్తకః । అభయం కురు తావదాశు మే గతజీవస్య పునః కిమౌషధైః ॥ ౯॥ సవిషైరివ భీమపన్నగైర్విషయైరేభిరలం పరిక్షతమ్ । అమృతైరివ సంభ్రమేణ మామభిషిఞ్చాశు దయావలోకనైః ॥ ౧౦॥ మునయో బహవోఽద్య ధన్యతాం గమితా స్వాభిమతార్థదర్శినః । కరుణాకర యేన తేన మామవసన్నం నను పశ్య చక్షుషా ॥ ౧౧॥ ప్రణమామ్యథ యామి చాపరం శరణం కం కృపణాభయప్రదమ్ । విరహీవ విభో ప్రియామయం పరిపశ్యామి భవన్మయం జగత్ ॥ ౧౨॥ బహవో భవతాఽనుకమ్పితాః కిమితీశాన న మానుకమ్పసే । దధతా కిము మన్దరాచలం పరమాణుః కమఠేన దుర్ధరః ॥౧౩॥ అశుచిం యది మానుమన్యసే కిమిదం మూర్ధ్ని కపాలదామ తే । ఉత శాఠ్యమసాధుసఙ్గినం విషలక్ష్మాసి న కిం ద్విజిహ్వధృక్॥ ౧౪॥ క్వ దృశం విదధామి కిం కరోమ్యనుతిష్ఠామి కథం భయాకులః । క్వ ను తిష్ఠసి రక్ష రక్ష మామయి శమ్భో శరణాగతోఽస్మి తే ॥ ౧౫॥ విలుఠామ్యవనౌ కిమాకులః కిమురో హన్మి శిరశ్ఛినద్మి వా । కిము రోదిమి రారటీమి కిం కృపణం మాం న యదీక్షసే ప్రభో ॥ ౧౬॥ శివ సర్వగ శర్వ శర్మదం ప్రణతో దేవ దయాం కురుష్వ మే । నమ ఈశ్వర నాథ దిక్పతే పునరేవేశ నమో నమోఽస్తు తే ॥ ౧౭॥ శరణం తరుణేన్దుశేఖరః శరణం మే గిరిరాజకన్యకా । శరణం పునరేవ తావుభౌ శరణం నాన్యదుపైమి దైవతమ్ ॥ ౧౮॥ ఉపమన్యుకృతం స్తవోత్తమం జపతః శమ్భుసమీపవర్తినః । అభివాఞ్ఛితభాగ్యసమ్పదః పరమాయుః ప్రదదాతి శఙ్కరః ॥ ౧౯॥ ఉపమన్యుకృతం స్తవోత్తమం ప్రజపేద్యస్తు శివస్య సన్నిధౌ । శివలోకమవాప్య సోఽచిరాత్సహ తేనైవ శివేన మోదతే ॥ ౨౦॥ ఇత్యుపమన్యుకృతం శివస్తోత్రం సమ్పూర్ణమ్ ।
Comments
Post a Comment