త్రిపురసున్దరీవేదపాదస్తోత్రమ్
॥ త్రిపురసున్దరీవేదపాదస్తోత్రమ్ ॥
వేదపాదస్తవం వక్ష్యే దేవ్యాః ప్రియచికీర్షయా ।
యథామతి మతిం దేవస్తన్నో దన్తిః ప్రచోదయాత్ ॥ ౧॥
అకిఞ్చిత్కరకర్మభ్యః ప్రత్యాహృత్య కృపావశాత్ ।
సుబ్రహ్మణ్యః స్తుతావస్యాం తన్నః షణ్ముఖః ప్రచోదయాత్ ॥ ౨॥
అకారాదిక్షకారాన్తవర్ణావయవశాలినీ ।
వీణాపుస్తకహస్తాఽవ్యాత్ ప్రణో దేవీ సరస్వతీ ॥ ౩॥
యా వర్ణపదవాక్యార్థగద్యపద్యస్వరూపిణీ ।
వాచి నర్తయతు క్షిప్రం మేధాం దేవీ సరస్వతీ ॥ ౪॥
ఉపాస్యమానా విప్రేన్ద్రైః సన్ధ్యాసు చ తిసృష్వపి ।
సద్యః ప్రసీద మే మాతః సన్ధ్యావిద్యే సరస్వతీ ॥ ౫॥
మన్దా నిన్దాలోలుపాఽహం స్వభావాత్
ఏతత్స్తోత్రం పూర్యతే కిం మయేతి ।
మా తే భీతిర్హే మతే త్వాదృశానామ్
ఏషా నేత్రీ రాధసా సూనృతానామ్ ॥ ౬॥
తరఙ్గభృకుటీకోటిభఙ్గ్యా తర్జయతే జరామ్ ।
సుధామయాయ శుభ్రాయ సిన్ధూనాం పతయే నమః ॥ ౭॥
తస్య మధ్యే మణిద్వీపః కల్పకారామభూషితః ।
అస్తు మే లలితావాసః స్వస్తిదా అభయఙ్కరః ॥ ౮॥
కదమ్బమఞ్జరీనిర్యద్వారుణీపారణోన్మదైః ।
ద్విరేఫైర్వర్ణనీయాయ వనానాం పతయే నమః ॥ ౯॥
తత్ర వప్రావలీలీలాగగనోల్లఙ్ఘిగోపురమ్ ।
మాతః కౌతూహలం దద్యాత్సుహార్యం నగరం తవ ॥ ౧౦॥
మకరన్దఝరీమజ్జన్మిలిన్దకులసఙ్కులామ్ ।
మహాపద్మాటవీం వన్దే యశసా సమ్పరీవృతామ్ ॥ ౧౧॥
తత్రైవ చిన్తామణిధోరణోఽర్చిభిర్-
వినిర్మితం రోపితరత్నశృఙ్గమ్ ।
భజే భవానీ భవనావతంసమ్
ఆదిత్యవర్ణం తమసః పరస్తాత్ ॥ ౧౨॥
మునిభిః స్వాత్మలాభాయ యచ్చక్రం హృది సేవ్యతే ।
తత్ర పశ్యామి బుధ్యా తదక్షరే పరమే వ్యోమన్ ॥ ౧౩॥
పఞ్చబ్రహ్మమయో మఞ్చస్తత్ర యో బిన్దుమధ్యగః ।
తవ కామేశి వాసోఽయమాయుష్మన్తం కరోతు మామ్ ॥ ౧౪॥
నానారత్నగులుచ్ఛాలీకాన్తికిమ్మీలితోదరమ్ ।
విమృశామి వితానం తేఽతిశ్లక్ష్ణమతిలోమశమ్ ॥ ౧౫॥
పర్యఙ్కతల్పోపరి దర్శనీయం
సబాణచాపాఙ్కుశపాశపాణిమ్ ।
అశేషభూషారమణీయమీడే
త్రిలోచనం నీలకణ్ఠం ప్రశాన్తమ్ ॥ ౧౬॥
జటారుణం చన్ద్రకలాలలామమ్
ఉద్వేలలావణ్యకలాభిరామమ్ ।
కామేశ్వరం కామశరాసనాఙ్కం
సమస్తసాక్షిం తమసః పరస్తాత్ ॥ ౧౭॥
తత్ర కామేశవామాఙ్కే ఖేలన్తీమలికున్తలామ్ ।
సచ్చిదానన్దలహరీం మహాలక్ష్మీముపాస్మహే ॥ ౧౮॥
చారుగోరోచనాపఙ్కజమ్బాలితఘనస్తనీమ్ ।
నమామి త్వామహం లోకమాతరం పద్మమాలినీమ్ ॥ ౧౯॥
శివే నమన్నిర్జరకుఞ్జరాసుర-
ప్రతోలికామౌలిమరీచివీచిభిః ।
ఇదం తవ క్షాలనజాతసౌభగం
చరణం నో లోకే సుధితాం దధాతు ॥ ౨౦॥
కల్పస్యాదౌ కారణేశానపి త్రీన్
స్రష్టుం దేవి త్రీన్గుణానాదధానామ్ ।
సేవే నిత్యం శ్రేయసే భూయసే త్వా-
మజామేకాం లోహితశుక్లకృష్ణామ్ ॥ ౨౧॥
కేశోద్భూతైరద్భుతామోదపూరై-
రాశాబృన్దం సాన్ద్రమాపూరయన్తీమ్ ।
త్వామానమ్య త్వత్ప్రసాదాత్స్వయమ్భూ-
రస్మాన్మాయీ సృజతే విశ్వమేతత్ ॥ ౨౨॥
అర్ధోన్మీలద్యౌవనోద్దామదర్పాం
దివ్యాకల్పైరర్పయన్తీం మయూఖాన్ ।
దేవి ధ్యాత్వా త్వాం పురా కైటభారి-
ర్విశ్వం బిభర్తి భువనస్య నాభిః ॥ ౨౩॥
కహ్లారశ్రీమఞ్జరీపుఞ్జరీతిం
ధిక్కుర్వన్తీమమ్బ తే పాటలిమ్నా ।
మూర్తిం ధ్యాత్వా శాశ్వతీం భూతిమాయ-
న్నిన్ద్రో రాజా జగతో య ఈశే ॥ ౨౪॥
దేవతాన్తరమన్త్రౌఘజపశ్రీఫలభూతయా ।
జాపకస్తవ దేవ్యన్తే విద్యయా విన్దతేఽమృతమ్ ॥ ౨౫।
పుంస్కోకిలకలక్వాణకోమలాలాపశాలిని ।
భద్రాణి కురు మే మాతర్దురితాని పరాసువ ॥ ౨౬॥
అన్తేవాసిన్నస్తి చేత్తే ముముక్షా
వక్ష్యే యుక్తిం ముక్తసర్వైషణస్సన్ ।
సద్భ్యః సాక్షాత్ సున్దరీం జ్ఞప్తిరూపాం
శ్రద్ధాభక్తిజ్ఞానయోగాదవేహి ॥ ౨౭॥
షోఢాన్యాసాదిదేవైశ్చ సేవితా చక్రమధ్యగా ।
కామేశమహిషీ భూయః షోడశీ శర్మ యచ్ఛతు ॥ ౨౮॥
శాన్తో దాన్తో దేశికేన్ద్రం ప్రణమ్య
తస్యాదేశాత్తారకం మన్త్రతత్త్వమ్ ।
జానీతే చేదమ్బ ధన్యః సమానం
నాతః పరం వేదితవ్యం హి కిఞ్చిత్ ॥ ౨౯॥
త్వమేవ కారణం కార్యం క్రియా జ్ఞానం త్వమేవ చ ।
త్వామమ్బ న వినా కిఞ్చిత్ త్వయి సర్వం ప్రతిష్ఠితమ్ ॥ ౩౦॥
పరాగమద్రీన్ద్రసుతే తవాఙ్ఘ్రి-
సరోజయోరమ్బ దధామి మూర్ధ్నా ।
అలఙ్కృతం వేద(/దేవ)వధూశిరోభి-
ర్యతో జాతో భువనాని విశ్వా ॥ ౩౧॥
దుష్టాన్ దైత్యాన్ హన్తుకామాం మహర్షీన్
శిష్టానన్యాన్ పాతుకామాం కరాబ్జైః ।
అష్టాభిస్త్వాం సాయుధైర్భాసమానాం
దుర్గాం దేవీం శరణమహం ప్రపద్యే ॥ ౩౨॥
దేవి సర్వానవద్యాఙ్గీం త్వామనాదృత్య యే క్రియాః ।
కుర్వన్తి నిష్ఫలాస్తేషామదుగ్ధా ఇవ ధేనవః ॥ ౩౩॥
నాహం మన్యే దైవతం మాన్యమన్య-
త్త్వత్పాదాబ్జాదమ్బికే కుమ్భజాద్యాః ।
యే ధ్యాతారో భక్తిసంశుద్ధచిత్తాః
పరామృతాత్ పరిముచ్యన్తి సర్వే ॥ ౩౪॥
కుర్వాణోఽపి దురారమ్భాం స్తవ నామాని శామ్భవి ।
ప్రజపన్నేతి మాయాన్తమతిమృత్యుం తరామ్యహమ్ ॥ ౩౫॥
కల్యాణి త్వం కున్దహాసప్రకాశై-
రన్తర్ధ్వాన్తం నాశయన్తీ క్షణేన ।
హన్తాస్మాకం ధ్యాయతాం త్వత్పదాబ్జ-
ముచ్చతిష్ఠ మహతే సౌభగాయ ॥ ౩౬॥
తితీర్షయా భవామ్భోధేర్హయగ్రీవాదయః పురా ।
అప్రమత్తా భవత్పూజాం సువిద్వాంసో వితేనిరే ॥ ౩౭॥
మద్వంశ్యా యే దురాచారా యే చ సన్మార్గగామినః ।
భవత్యాః కృపయా సర్వే సువర్యన్తు యజమానాః ॥ ౩౮॥
శ్రీచక్రస్థాం శాశ్వతైశ్వర్యదాత్రీం
పౌణ్డ్రం చాపం పుష్పబాణాన్దధానామ్ ।
బన్ధూకాభాం భావయామి త్రినేత్రాం
తామగ్నివర్ణాం తపసా జ్వలన్తీమ్ ॥ ౩౯॥
భవాని తవ పాదాబ్జనిర్ణేజనపవిత్రితాః
భవామయప్రశాన్త్యై త్వామపో యాచామి భేషజమ్ ॥ ౪౦॥
చిదానన్దసుధామ్భోధేస్తవానన్దలవోఽస్తి యః
కారణేశైస్త్రిభిస్సాకం తద్విశ్వముపజీవతి ॥ ౪౧॥
నో వా యాగైర్నైవ పూర్తాదికృత్యై-
ర్నో వా జప్యైర్నో మహద్భిస్తపోభిః ।
నో వా యోగైః క్లేశకృద్భిః సుమేధా
నిచాయ్యేమాం శాన్తిమత్యన్తమేతి ॥ ౪౨॥
ప్రాతః పాహి మహావిద్యే మధ్యాహ్నే తు మృడప్రియే ।
సాయం పాహి జగద్వన్ద్యే పునర్నః పాహి విశ్వతః ॥ ౪౩॥
బన్ధూకాభైర్భానుభిర్భాసయన్తీ
విశ్వం శశ్వత్తుఙ్గపీనస్తనార్ధా ।
లావణ్యాబ్ధేః సున్దరి త్వం ప్రసాదా-
దాయుః ప్రజాం రయిమస్మాసు ధేహి ॥ ౪౪॥
కర్ణాకర్ణయ మే తత్త్వం యా చిచ్ఛక్తిరితీర్యతే ।
త్రిర్వదామి ముముక్షూణాం సా కాష్ఠా సా పరగతిః ॥ ౪౫॥
వాగ్దేవీతి త్వాం వదన్త్యమ్బ కేచి-
ల్లక్ష్మీర్గౌరీత్యేవమన్యే వదన్తి ।
శశ్వన్మాతః ప్రత్యగద్వైతరూపాం
శంసన్తి కేచిన్నివిదో జనాః ॥ ౪౬॥
లలితేతి సుధాపూరమాధురీచోరమమ్బికే ।
తవ నామాస్తి యత్తేన జిహ్వా మే మధుమత్తమా ॥ ౪౭॥
యే సమ్పన్నాః సాధనైస్తైశ్చత్తుర్భిః
శుశ్రూషాభిర్దేశికం ప్రీణయన్తి ।
సమ్యగ్విద్వాఞ్శుద్ధసత్త్వాన్తరాణాం
తేషామేవైతాం బ్రహ్మవిద్యాం వదేత ॥ ౪౮॥
అభిచారాదిభిః కృత్యాం యః ప్రేరయతి మయ్యుమే ।
తవ హుఙ్కారసన్త్రస్తా ప్రత్యక్కర్తారమృచ్ఛతు ॥ ౪౯॥
జగత్పవిత్రి మామికామపహరాశు దుర్జరామ్ ।
ప్రసీద మే దయా ధునే ప్రశస్తిమమ్బ నస్కృధి ॥ ౫౦॥
కదమ్బారుణమమ్బాయా రూపం చిన్తయ చిత్త మే ।
ముఞ్చ పాపీయసీం నిష్ఠాం మా గృధః కస్య స్విద్ధనమ్ ॥ ౫౧॥
భణ్డభణ్డనలీలాయాం రక్తచన్దనపఙ్కిలః ।
అఙ్కుశస్తవ తం హన్యాద్యశ్చ నో ద్విషతే జనః ॥ ౫౨॥
రే రే చిత్త త్వం వృథా శోకసిన్ధౌ
మజ్జస్యన్తర్వచ్మ్యుపాయం విముక్త్యై ।
దేవ్యాః పాదౌ పూజయైకాక్షరేణ
తత్తే పదం సఙ్గ్రహేణ బ్రవీమ్యోమ్ ॥ ౫౩॥
చఞ్చద్బాలాతపజ్యోత్స్నాకలామణ్డలశాలినే ।
ఐక్షవాయ నమో మాతర్బాహుభ్యాం తవ ధన్వనే ॥ ౫౪॥
తామేవాద్యాం బ్రహ్మవిద్యాముపాసే
మూర్తైర్వేదైః స్తూయమానాం భవానీమ్ ।
హన్త స్వాత్మత్త్వేన యాం ముక్తికామో
మత్వా ధీరో హర్షశోకౌ జహాతి ॥ ౫౫॥
శరణం కరవాణ్యమ్బ చరణం తవ సున్దరి ।
శేపే త్వత్పాదుకాభ్యాం మే నాన్యః పన్థా అయనాయ ॥ ౫౬॥
రత్నచ్ఛత్రైశ్చామరైర్దర్పణాద్యై-
శ్చక్రేశానీం సర్వదోపచారయన్త్యః ।
యోగిన్యోఽన్యాః శక్తయశ్చాణిమాద్యా
యూయం పాత స్వస్తిభిః సదా నః ॥ ౫౭॥
దరిద్రం మాం విజానీహి సర్వజ్ఞాసి యతః శివే ।
దూరీకృత్యాశు దురితమథ నో వర్ధయారయిమ్ ॥ ౫౮॥
మహేశ్వరి మహామన్త్రకూటత్రయకలేబరే ।
కాదివిద్యాక్షరశ్రేణీముశన్తస్త్వా హవామహే ॥ ౫౯॥
మూలాధారాదూర్ధ్వమన్తశ్చరన్తీం
భిత్త్వా గ్రన్థీన్మూర్ధ్ని నిర్యత్సుధార్ద్రామ్ ।
పశ్యన్తస్త్వాం యే చ తృప్తిం లభన్తే
తేషాం శాన్తిః శాశ్వతీ నేతరేషామ్ ॥ ౬౦॥
మహ్యం ద్రుహ్యన్తి యే మాతః త్వద్ధ్యానాసక్తచేతసే ।
తానమ్బ సాయకైరేభిరవ బ్రహ్మద్విషో జహి ॥ ౬౧॥
త్వద్భక్తానామమ్బ శాన్తైషణానాం
బ్రహ్మిష్ఠానాం దృష్టిపాతేన పూతః ।
పాపీయానప్యావృతః స్వర్వధూభిః
శోకాతిగో మోదతే స్వర్గలోకే ॥ ౬౨॥
సన్తు విద్యా జగత్యస్మిన్ సంసారభ్రమహేతవః ।
భజేఽహం త్వాం యయా విద్వాన్ విద్యయాఽమృతమశ్నుతే ॥ ౬౩॥
విద్వన్ముఖ్యైర్విద్రుమాభం విశాల-
శ్రోణీశిఞ్జన్మేఖలాకిఙ్కిణీకమ్ ।
చన్ద్రోత్తంసం చిన్మయం వస్తు కిఞ్చి-
ద్విద్ధి త్వమేతన్నిహితం గుహాయామ్ ॥ ౬౪॥
న విస్మరామి చిన్మూర్తిమిక్షుకోదణ్డశాలినీమ్ ।
మునయః సనకప్రేష్ఠాస్తామాహుః పరమాం గతిమ్ ॥ ౬౫॥
చక్షుఃప్రేఙ్ఖత్ప్రేమకారుణ్యధారాం
హంసజ్యోత్స్నాపూరహృష్యచ్చకోరామ్ ।
యామాశ్లిష్యన్మోదతే దేవదేవః
సా నో దేవీ సుహవా శర్మ యచ్ఛతు ॥ ౬౬॥
ముఞ్చ వఞ్చకతాం చిత్త పామరం చాపి దైవతమ్ ।
గృహాణ పదమమ్బాయా ఏతదాలమ్బనం పరమ్ ॥ ౬౭॥
కా మే భీతిః కా క్షతిః కిం దురాపం
కామేశాఙ్కోత్తుఙ్గపర్యఙ్కసంస్థామ్ ।
తత్త్వాతీతామచ్యుతానన్దదాత్రీం
దేవీమహం నిరృతిం వన్దమానః ॥ ౬౮॥
చిన్తామణిమయోత్తంసకాన్తికఞ్చుకితాననే ।
లలితే త్వాం సకృన్నత్వా న బిభేతి కుతశ్చన ॥ ౬౯॥
తారుణ్యోత్తుఙ్గితకుచే లావణ్యోల్లాసితేక్షణే ।
తవాజ్ఞయైవ కామాద్యా మాస్మాన్ప్రాపన్నరాతయః ॥ ౭౦॥
ఆకర్ణాకృష్టకామాసస్త్రసఞ్జాతం తాపమమ్బ మే ।
ఆచామతు కటాక్షస్తే పర్జన్యో వృష్టిమానివ ॥ ౭౧॥
కుర్వే గర్వేణాపచారానపారా-
నద్యప్యమ్బ త్వత్పదాబ్జం తథాపి ।
మన్యే ధన్యే దేవి విద్యావలమ్బం
మాతేవ పుత్రం బిభృతాస్వేనమ్ ॥ ౭౨॥
యథోపాస్తిక్షతిర్నస్యాత్తవ చక్రస్య సున్దరి ।
కృపయా కురు కల్యాణి తథా మే స్వస్తిరాయుషి ॥ ౭౩॥
చక్రం సేవే తావకం సర్వసిద్ధ్యై
శ్రీమన్మాతః సిద్ధయశ్చాణిమాద్యాః ।
నిత్యా ముద్రా శక్తయశ్చాఙ్గదేవ్యో
యస్మిన్దేవా అధి విశ్వే నిషేదుః ॥ ౭౪॥
సుకుమారే సుఖాకారే సునేత్రే సూక్ష్మమధ్యమే ।
సుప్రసన్నా భవ శివే సుమృడీకా సరస్వతీ ॥ ౭౫॥
విద్యుద్వల్లీకన్దలీం కల్పయన్తీం
మూర్తిం స్ఫూర్త్యా పఙ్కజం ధారయన్తీమ్ ।
ధ్యాయన్ హి త్వాం జాయతే సార్వభౌమో
విశ్వా ఆశాః పృతనాః సఞ్జయన్జయన్ ॥ ౭౬॥
అవిజ్ఞాయ పరాం శక్తిమాత్మభూతాం మహేశ్వరీమ్ ।
అహో పతన్తి నిరయేషు యే కే చాత్మహనో జనాః ॥ ౭౭॥
సిన్దూరాభైస్సున్దరైరంశుబృన్దైః
లాక్షాలక్ష్మ్యాం మజ్జయన్తీం జగన్తి ।
హేరమ్బామ్బ త్వాం హృదా లమ్బతే య-
స్తస్మై విశః స్వయమేవానమన్తే ॥ ౭౮॥
తవ తత్త్వం విమృశతాం ప్రత్యగద్వైతలక్షణమ్ ।
చిదానన్దఘనాదన్యన్నేహ నానాస్తి కిఞ్చన ॥ ౭౯॥
కణ్ఠాత్కుణ్డలినీం నీత్వా సహస్రారం శివే తవ ।
న పునర్జాయతే గర్భే సుమేధా అమృతోక్షితః ॥ ౮౦॥
త్వత్పాదుకానుసన్ధానప్రాప్తసర్వాత్మతాదృశి ।
పూర్ణాహఙ్కృతిమత్యస్మిన్న కర్మ లిప్యతే నరే ॥ ౮౧॥
తవానుగ్రహనిర్భిన్నహృదయగ్రన్థిరద్రిజే ।
స్వాత్మత్వేన జగన్మత్వా తతో న విజుగుప్సతే ॥ ౮౨॥
కదా వసుదలోపేతే త్రికోణనవకాన్వితే ।
ఆవాహయామి చక్రే త్వాం సూర్యాభాం శ్రియమైశ్వరీమ్ ॥ ౮౩॥
హ్రీమిత్యేకం తావకం వాచకార్ణం
యజ్జిహ్వాగ్రే దేవి జాగర్తి కిఞ్చిత్ ।
కో వాయం స్యాత్కామకామస్త్రిలోక్యాం
సర్వేఽస్మై దేవాః బలిమావహన్తి ॥ ౮౪॥
నాకస్త్రీణాం కిన్నరీణాం నృపాణా-
ప్యాకర్షి చేతసా చిన్తనీయమ్ ।
త్వత్పాణిస్థం కుఙ్కుమాభం శివే యం
ద్విష్మస్తస్మిన్ప్రతి ముఞ్చామి పాశమ్ ॥ ౮౫॥
నూనం సింహాసనేశ్వర్యాస్తవాజ్ఞాం శిరసా వహన్ ।
భయేన పవమానోఽయం సర్వా దిశోఽనువిధావతి ॥ ౮౬॥
త్రికాలాఢ్యాం త్రిహృల్లేఖాం ద్విహంసస్వరభూషితామ్ ।
యో జపత్యమ్బ తే విద్యాం సోఽక్షరః పరమః స్వరాట్ ॥ ౮౭॥
దారిద్ర్యాబ్ధౌ దేవి మగ్నోఽపి శశ్వ-
ద్వాచా యాచే నాహమమ్బ త్వదన్యమ్ ।
తస్మాదస్మద్వాఞ్ఛితం పూరయైత-
దుషా సా నక్తా సుదుఘేవ ధేనుః ॥ ౮౮॥
యో వా యద్యత్కామనాకృష్టచిత్తః
స్తుత్వోపాస్తే దేవి తే చక్రవిద్యామ్ ।
కల్యాణానామాలయః కాలయోగాత్
తం తం లోకం జయతే తాంశ్చ కామాన్ ॥ ౮౯॥
సాధకస్సతతం కుర్యాదైక్యం శ్రీచక్రదేహయోః ।
తథా దేవ్యాత్మనోరైక్యమేతావదనుశాసనమ్ ॥ ౯౦॥
హస్తామ్భోజప్రోల్లసచ్చామరాభ్యాం
శ్రీవాణీభ్యాం పార్శ్వయోర్వీజ్యమానామ్ ।
శ్రీసామ్రాజ్ఞి త్వాం సదా లోకయేయం
సదా సద్భిః సేవ్యమానాం నిగూఢామ్ ॥ ౯౧॥
ఇష్టానిష్టప్రాప్తివిచ్ఛిత్తిహేతుః
స్తోతుం వాచాం కౢప్తిరిత్యేవ మన్యే ।
త్వద్రూపం హి స్వానుభూత్యైకవేద్యం
న చక్షుషా గృహ్యతే నాపి వాచా ॥ ౯౨॥
హరస్వరైశ్చతుర్వర్గప్రదం మన్త్రం సబిన్దుకమ్ ।
దేవ్యా జపత విప్రేన్ద్రా అన్యా వాచో విముఞ్చథ ॥ ౯౩॥
యస్తే రాకాచన్ద్రబిమ్బాసనస్థాం
పీయూషాబ్ధిం కల్పయన్తీం మయూఖైః ।
మూర్తిం భక్త్యా ధ్యాయతే హృత్సరోజే
న తస్య రోగో న జరా న మృత్యుః ॥ ౯౪॥
తుభ్యం మాతర్యోఽఞ్జలిం మూర్ధ్ని ధత్తే
మౌలిశ్రేణ్యా భూభుజస్తం నమన్తి ।
యః స్తౌతి త్వామమ్బ చిద్వల్లివాచా
తం ధీరాసః కవయ ఉన్నయన్తి ॥ ౯౫॥
వైరిఞ్చోఘైర్విష్ణురుద్రేన్ద్రబృన్దైః
దుర్గాకాలీభైరవీశక్తిసంఙ్ఘైః ।
యత్రే(న్త్రే)శి త్వం వర్తతే(సే) స్తూయమానా
న తత్ర సూర్యో భాతి న చన్ద్రతారకమ్ ॥ ౯౬॥
భూత్యై భవాని త్వాం వన్దే సురాః శతమఖాదయః ।
త్వామానమ్య సమృద్ధాః స్యురాయో ధామాని దివ్యాని ॥ ౯౭॥
పుష్పవత్ఫుల్లతాటఙ్కాం ప్రాతరాదిత్యపాటలామ్ ।
యస్త్వామన్తః స్మరత్యమ్బ తస్య దేవా అసన్వశే ॥ ౯౮॥
వశ్యే విద్రుమసఙ్కాశాం విద్యాయాం విశదప్రభామ్ ।
త్వామమ్బ భావయేద్భూత్యై సువర్ణాం హేమమాలినీమ్ ॥ ౯౯॥
వామాఙ్గస్థామీశితుర్దీప్యమానాం
భూషాబృన్దైరిన్దురేఖావతంసామ్ ।
యస్త్వాం పశ్యన్ సతతం నైవ తృప్తః
తస్మై చ దేవి వషడస్తు తుభ్యమ్ ॥ ౧౦౦॥
నవనీపవనీవాసలాలసోత్తమమానసే ।
శృఙ్గారదేవతే మాతః శ్రియం వాసయ మే కులే ॥ ౧౦౧॥
భక్త్యాభక్త్యా వాపి పద్యావసాన-
శ్రుత్యా స్తుత్యా చైతయా స్తౌతి యస్త్వామ్ ।
తస్య క్షిప్రం త్వత్ప్రసాదేన మాతః
సత్యాః సన్తు యజమానస్య కామాః ॥ ౧౦౨॥
బాలిశేన మయా ప్రోక్తమపి వాత్సల్యశాలినోః ।
ఆనన్దమాదిదమ్పత్యోరిమా వర్ధన్తు వాఙ్గిరః ॥ ౧౦౩॥
మాధురీసౌరభావాసచాపసాయకధారిణీమ్ ।
దేవీం ధ్యాయన్ పఠేదేతత్సర్వకామార్థసిద్ధయే ॥ ౧౦౪॥
స్తోత్రమేతత్ప్రజపతస్తవ త్రిపురసున్దరి ।
అనుద్వీక్ష్య భయాద్దూరం మృత్యుర్ధావతి పఞ్చమః ॥ ౧౦౫॥
యః పఠతి స్తుతిమేతాం విద్యావన్తం తమమ్బ ధనవన్తమ్ ।
కురు దేవి యశస్వన్తం వర్చస్వన్తం మనుష్యేషు ॥ ౧౦౬॥
యే శృణ్వన్తి స్తుతిమిమాం తవ దేవ్యనసూయకాః ।
తేభ్యో దేహి శ్రియం విద్యాముద్వర్చ ఉత్తనూబలమ్ ॥ ౧౦౭॥
త్వామేవాహం స్తౌమి నిత్యం ప్రణౌమి
శ్రీవిద్యేశాం వచ్మి సఞ్చిన్తయామి ।
అధ్యాస్తే యా విశ్వమాతా విరాజో
హృత్పుణ్డరీకం విరజం విశుద్ధమ్ ॥ ౧౦౮॥
శఙ్కరేణ రచితం స్తవోత్తమం
యః పఠేజ్జగతి భక్తిమాన్నరః ।
తస్య సిద్ధిరతులా భవేద్ధ్రువా
సున్దరీ చ సతతం ప్రసీదతి ॥ ౧౦౯॥
యత్రైవ యత్రైవ మనో మదీయం
తత్రైవ తత్రైవ తవ స్వరూపమ్ ।
యత్రైవ యత్రైవ శిరో మదీయం
తత్రైవ తత్రైవ పదద్వయం తే ॥ ౧౧౦॥
॥ ఇతి శ్రీమత్పరమహంసపరివ్రాజకాచార్యస్య
శ్రీగోవిన్దభగవత్పూజ్యపాదశిష్యస్య
శ్రీమచ్షఙ్కరభగవతః కృతౌ త్రిపురసున్దరీవేదపాదస్తోత్రం సమ్పూర్ణమ్ ॥
Comments
Post a Comment