త్రిపురసున్దరీమానసపూజాస్తోత్రమ్
॥ త్రిపురసున్దరీమానసపూజాస్తోత్రమ్ ॥
శ్రీః
మమ న భజనశక్తిః పాదయోస్తే న భక్తి-
ర్న చ విషయవిరక్తిర్ధ్యానయోగే న సక్తిః ।
ఇతి మనసి సదాహం చిన్తయన్నాద్యశక్తే
రుచిరవచనపుష్పైరర్చనం సంచినోమి ॥ ౧॥
వ్యాప్తం హాటకవిగ్రహైర్జలచరైరారూఢదేవవ్రజైః
పోతైరాకులితాన్తరం మణిధరైర్భూమీధరైర్భూషితమ్ ।
ఆరక్తామృతసిన్ధుముద్ధురచలద్విచీచయవ్యాకుల-
వ్యోమానం పరిచిన్త్య సన్తతమహో చేతః కృతార్థీభవ ॥ ౨॥
తస్మిన్నుజ్జ్వలరత్నజాలవిలసత్కాన్తిచ్ఛటాభిః స్ఫుటం
కుర్వాణం వియదిన్ద్రచాపనిచయైరాచ్ఛాదితం సర్వతః ।
ఉచ్చైఃశృఙ్గనిషణ్ణదివ్యవనితాబృన్దాననప్రోల్లస-
ద్గీతాకర్ణననిశ్చలాఖిలమృగం ద్వీపం నమస్కుర్మహే ॥ ౩॥
జాతీచమ్పకపాటలాదిసుమనఃసౌరభ్యసమ్భావితం
హ్రీఙ్కారధ్వనికణ్ఠకోకిలకుహూప్రోల్లాసిచూతద్రుమమ్ ।
ఆవిర్భూతసుగన్ధిచన్దనవనం దృష్టిప్రియం నన్దనం
చఞ్చచ్చఞ్చలచఞ్చరికచటులం చేతశ్చిరం చిన్తయ ॥ ౪॥
పరిపతితపరాగైః పాటలక్షోణిభాగో
వికసితకుసుమోచ్చైః పీతచన్ద్రార్కరశ్మిః ।
అలిశుకపికరాజీకూజితైః శ్రోత్రహారీ
స్ఫురతు హృది మదీయే నూనముద్యానరాజః ॥ ౫॥
రమ్యద్వారపురప్రచారతమసాం సంహారకారిప్రభ
స్ఫూర్జత్తోరణభారహారకమహావిస్తారహారద్యుతే ।
క్షోణీమణ్డలహేమహారవిలసత్సంసారపారప్రద
ప్రోద్యద్భక్తమనోవిహార కనకప్రాకార తుభ్యం నమః ॥ ౬॥
ఉద్యత్కాన్తికలాపకల్పితనభఃస్ఫూర్జద్వితానప్రభ
సత్కృష్ణాగరుధూపవాసితవియత్కాష్ఠాన్తరే విశ్రుతః ।
సేవాయాతసమస్తదైవతగణైరాసేవ్యమానోఽనిశం
సోఽయం శ్రీమణిమణ్డపోఽనవరతం మచ్చేతసి ద్యోతతామ్ ॥ ౭॥
క్వాపి ప్రోద్భటపద్మరాగకిరణవ్రాతేన సన్ధ్యాయితం
కుత్రాపి స్ఫుటవిస్ఫురన్మరకతద్యుత్యా తమిస్రాయితమ్ ।
మధ్యాలమ్బివిశాలమౌక్తికరుచా జ్యోత్స్నాయితం కుత్రచి-
న్మాతః శ్రీమణిమన్దిరం తవ సదా వన్దామహే సున్దరమ్ ॥ ౮॥
ఉత్తుఙ్గాలయవిస్ఫురన్మరకతప్రోద్యత్ప్రభామణ్డలా-
న్యాలోక్యాఙ్కురితోత్సవైర్నవతృణాకీర్ణస్థలీశఙ్కయా ।
నీతో వాజిభిరుత్పథం బత రథః సూతేన తిగ్మద్యుతే-
ర్వల్గావల్గిగతహస్తమస్తశిఖరం కష్టైరితః ప్రాప్యతే ॥ ౯॥
మణిసదనసముద్యత్కాన్తిధారానురక్తే
వియతి చరమసన్ధ్యాశఙ్కినో భానురథ్యాః ।
శిథిలితగతకుప్యత్సూతహుఙ్కారనాదైః
కథమపి మణిగేహాదుచ్చకైరుచ్చలన్తి ॥ ౧౦॥
భక్త్యా కిం ను సమర్పితాని బహుధా రత్నాని పాథోధినా
కిం వా రోహణపర్వతేన సదనం యైర్విశ్వకర్మాకరోత్ ।
ఆ జ్ఞాతం గిరిజే కటాక్షకలయా నూనం త్వయా తోషితే
శమ్భౌ నృత్యతి నాగరాజఫణినా కీర్ణా మణిశ్రేణయః ॥ ౧౧॥ విదూరముక్తవాహనైర్వినమ్రమౌలిమణ్డలై-
ర్నిబద్ధహస్తసమ్పుటైః ప్రయత్నసంయతేన్ద్రియైః ।
విరిఞ్చివిష్ణుశఙ్కరాదిభిర్ముదా తవామ్బికే
ప్రతీక్ష్యమాణనిర్గమో విభాతి రత్నమణ్డపః ॥ ౧౨॥
ధ్వనన్మృదఙ్గకాహలః ప్రగీతకింనరీగణః
ప్రనృత్తదివ్యకన్యకః ప్రవృత్తమఙ్గలక్రమః ।
ప్రకృష్టసేవకవ్రజః ప్రహృష్టభక్తమణ్డలో
ముదే మమాస్తు సన్తతం త్వదీయరత్నమణ్డపః ॥ ౧౩॥
ప్రవేశనిర్గమాకులైః స్వకృత్యరక్తమానసై-
ర్బహిస్థితామరావలీవిధీయమానభక్తిభిః ।
విచిత్రవస్త్రభూషణైరుపేతమఙ్గనాజనైః
సదా కరోతు మఙ్గలం మమేహ రత్నమణ్డపః ॥ ౧౪॥
సువర్ణరత్నభూషితైర్విచిత్రవస్త్రధారిభి-
ర్గృహీతహేమయష్టిభిర్నిరుద్ధసర్వదైవతైః ।
అసంఖ్యసున్దరీజనైః పురస్థితైరధిష్ఠితో
మదీయమేతు మానసం త్వదీయతుఙ్గతోరణః ॥ ౧౫॥
ఇన్ద్రాదీంశ్చ దిగీశ్వరాన్సహపరివారానథో సాయుధా-
న్యోషిద్రూపధరాన్స్వదిక్షు నిహితాన్సంచిన్త్య హృత్పఙ్కజే ।
శఙ్ఖే శ్రీవసుధారయా వసుమతీయుక్తం చ పద్మం స్మర-
న్కామం నౌమి రతిప్రియం సహచరం ప్రీత్యా వసన్తం భజే ॥ ౧౬॥
గాయన్తీః కలవీణయాతిమధురం హుఙ్కారమాతన్వతీ-
ర్ద్వారాభ్యాసకృతస్థితీరిహ సరస్వత్యాదికాః పూజయన్ ।
ద్వారే నౌమి మదోన్మదం సురగణాధీశం మదేనోన్మదాం
మాతఙ్గీమసితామ్బరాం పరిలసన్ముక్తావిభూషాం భజే ॥ ౧౭॥
కస్తూరికాశ్యామలకోమలాఙ్గీం
కాదమ్బరీపానమదాలసాఙ్గీమ్ ।
వామస్తనాలిఙ్గితరత్నవీణాం
మాతఙ్గకన్యాం మనసా స్మరామి ॥ ౧౮॥
వికీర్ణచికురోత్కరే విగలితామ్బరాడమ్బరే
మదాకులితలోచనే విమలభూషణోద్భాసిని ।
తిరస్కరిణి తావకం చరణపఙ్కజం చిన్తయ-
న్కరోమి పశుమణ్డలీమలికమోహదుఘ్ధాశయామ్ ॥ ౧౯॥
ప్రమత్తవారుణీరసైర్విఘూర్ణమానలోచనాః
ప్రచణ్డదైత్యసూదనాః ప్రవిష్టభక్తమానసాః ।
ఉపోఢకజ్జలచ్ఛవిచ్ఛటావిరాజివిగ్రహః
కపాలశూలధారిణీః స్తువే త్వదీయదూతికాః ॥ ౨౦॥
స్ఫూర్జన్నవ్యయవాఙ్కురోపలసితాభోగైః పురః స్థాపితై-
ర్దీపోద్భాసిశరావశోభితముఖైః కుమ్భైర్నవైః శోభినా ।
స్వర్ణాబద్ధవిచిత్రరత్నపటలీచఞ్చత్కపాటశ్రియా
యుక్తం ద్వారచతుష్టయేన గిరిజే వన్దే మణీ మన్దిరమ్ ॥ ౨౧॥
ఆస్తీర్ణారుణకమ్బలాసనయుతం పుష్పోపహారాన్వితం
దీప్తానేకమణిప్రదీపసుభగం రాజద్వితానోత్తమమ్ ।
ధూపోద్గారిసుగన్ధిసమ్భ్రమమిలద్భృఙ్గావలీగుఞ్జితం
కల్యాణం వితనోతు మేఽనవరతం శ్రీమణ్డపాభ్యన్తరమ్ ॥ ౨౨॥
కనకరచితే పఞ్చప్రేతాసనేన విరాజితే
మణిగణచితే రక్తశ్వేతామ్బరాస్తరణోత్తమే ।
కుసుమసురభౌ తల్పే దివ్యోపధానసుఖావహే
హృదయకమలే ప్రాదుర్భూతాం భజే పరదేవతామ్ ॥ ౨౩॥
సర్వాఙ్గస్థితిరమ్యరూపరుచిరాం ప్రాతః సమభ్యుత్థితాం
జృమ్భామఞ్జుముఖామ్బుజాం మధుమదవ్యాఘూర్ణదక్షిత్రయామ్ ।
సేవాయాతసమస్తసంనిధిసఖీః సంమానయన్తీం దృశా
సమ్పశ్యన్పరదేవతాం పరమహో మన్యే కృతార్థం జనుః ॥ ౨౪॥
ఉచ్చైస్తోరణవర్తివాద్యనివహధ్వానే సముజ్జృమ్భితే
భక్తైర్భూమివిలగ్నమౌలిభిరలం దణ్డప్రణామే కృతే ।
నానారత్నసమూహనద్ధకథనస్థాలీసముద్భాసితాం
ప్రాతస్తే పరికల్పయామి గిరిజే నీరాజనాముజ్జ్వలామ్ ॥ ౨౫॥
పాద్యం తే పరికల్పయామి పదయోరర్ఘ్యం తథా హస్తయోః
సౌధీభిర్మధుపర్కమమ్బ మధురం ధారాభిరాస్వాదయ ।
తోయేనాచమనం విధేహి శుచినా గాఙ్గేన మత్కల్పితం
సాష్టాఙ్గం ప్రణిపాతమీశదయితే దృష్ట్యా కృతార్థీ కురు ॥ ౨౬॥
మాతః పశ్య ముఖామ్బుజం సువిమలే దత్తే మయా దర్పణే
దేవి స్వీకురు దన్తధావనమిదం గఙ్గాజలేనాన్వితమ్ ।
సుప్రక్షాలితమాననం విరచయన్స్నిగ్ధామ్బరప్రోఞ్ఛనం
ద్రాగఙ్గీకురు తత్త్వమమ్బ మధురం తామ్బూలమాస్వాదయ ॥ ౨౭॥
నిధేహి మణిపాదుకోపరి పదామ్బుజం మజ్జనా-
లయం వ్రజ శనైః సఖీకృతకరామ్బుజాలమ్బనమ్ ।
మహేశి కరుణానిధే తవ దృగన్తపాతోత్సుకా-
న్విలోకయ మనాగమూనుభయసంస్థితాన్దైవతాన్ ॥ ౨౮॥
హేమరత్నవరణేన వేష్టితం
విస్తృతారుణవితానశోభితమ్ ।
సజ్జసర్వపరిచారికాజనం
పశ్య మజ్జనగృహం మనో మమ ॥ ౨౯॥
కనకకలశజాలస్ఫాటికస్నానపీఠా-
ద్యుపకరణవిశాలం గన్ధమత్తాలిమాలమ్ ।
స్ఫురదరుణవితాం మఞ్జుగన్ధర్వగానం
పరమశివమహేలే మజ్జనాగారమేహి ॥ ౩౦॥
పీనోత్తుఙ్గపయోధరాః పరిలసత్సమ్పూర్ణచన్ద్రాననా
రత్నస్వర్ణవినిర్మితాః పరిలసత్సూక్ష్మామ్బరప్రావృతాః ।
హేమస్నానఘటీస్తథా మృదుపటిరుద్వర్తనం కౌసుమం
తైలం కఙ్కతికం కరేషు దధతీర్వన్దేఽమ్బ తే దాసికాః ॥ ౩౧॥
తత్ర స్ఫాటికపీఠమేత్య శనకైరుత్తారితాలఙ్కృతి-
ర్నీచైరుజ్ఝితకఞ్చుకోపరిహితారక్తోత్తరీయామ్బరా ।
వేణీబన్ధమపాస్య కఙ్కతికయా కేశప్రసాదం మనా-
క్కుర్వాణా పరదేవతా భగవతీ చిత్తే మమ ద్యోతతామ్ ॥ ౩౨॥
అభ్యఙ్గం గిరిజే గృహాణ మృదునా తైలేన సమ్పాదితం
కాశ్మీరైరగరుద్రవైర్మలయజైరుద్వర్తనం కారయ ।
గీతే కింనరకామినీభిరభితో వాద్యే ముదా వాదితే
నృత్యన్తీమిహ పశ్య దేవి పురతో దివ్యాఙ్గనామణ్డలీమ్ ॥ ౩౩॥
కృతపరికరబన్ధాస్తుఙ్గపీనస్తనాఢ్యా
మణినివహనిబద్ధా హేమకుమ్భీర్దధానాః ।
సురభిసలిలనిర్యద్గన్ధలుబ్ధాలిమాలాః
సవినయముపతస్థుః సర్వతః స్నానదాస్యః ॥ ౩౪॥
ఉద్గన్ధైరగరుద్రవైః సురభిణా కస్తూరికావారిణా
స్ఫూర్జత్సౌరభయక్షకర్దమజలైః కాశ్మీరనీరైరపి ।
పుష్పామ్భోభిరశేషతీర్థసలిలైః కర్పూరపాథోభరైః
స్నానం తే పరికల్పయామి గిరిజే భక్త్యా తదఙ్గీకురు ॥ ౩౫॥
ప్రత్యఙ్గం పరిమార్జయామి శుచినా వస్త్రేణ సమ్ప్రోఞ్ఛనం
కుర్వే కేశకలాపమాయతతరం ధూపోత్తమైర్ధూపితమ్ ।
ఆలీబృన్దవినిర్మితాం యవనికామాస్థాప్యరత్నప్రభం
భక్తత్రాణపరే మహేశగృహిణి స్నానామ్బరం ముచ్యతామ్ ॥ ౩౬॥
పీతం తే పరికల్పయామి నిబిడం చణ్డాతకం చణ్డికే
సూక్ష్మం స్నిగ్ధమురీకురుష్వ వసనం సిన్దూరపూరప్రభమ్ ।
ముక్తారత్నవిచిత్రహేమరచనాచారుప్రభాభాస్వరం
నీలం కఞ్చుకమర్పయామి గిరిశప్రాణప్రియే సున్దరి ॥ ౩౭॥
విలులితచికురేణ చ్ఛాదితాంసప్రదేశే
మణినికరవిరాజత్పాదుకాన్యస్తపాదే ।
సులలితమవలమ్బ్య ద్రాక్సఖీమంసదేశే
గిరిశగృహిణి భూషామణ్టపాయ ప్రయాహి ॥ ౩౮॥
లసత్కనకకుట్టిమస్ఫురదమన్దముక్తావలీ-
సముల్లసితకాన్తిభిః కలితశక్రచాపవ్రజే ।
మహాభరణమణ్డపే నిహితహేమసింహాసనం
సఖీజనసమావృతం సమధితిష్ఠ కాత్యాయని ॥ ౩౯॥
స్నిగ్ధం కఙ్కతికాముఖేన శనకైః సంశోధ్య కేశోత్కరం
సీమన్తం విరచయ్య చారు విమలం సిన్దూరరేఖాన్వితమ్ ।
ముక్తాభిర్గ్రథితాలకాం మణిచితైః సౌవర్ణసూత్రైః స్ఫుటం
ప్రాన్తే మౌక్తికగుచ్ఛకోపలతికాం గ్రథ్నామి వేణీమిమామ్ ॥ ౪౦॥
విలమ్బివేణీభుజగోత్తమాఙ్గ-
స్ఫురన్మణిభ్రాన్తిముపానయన్తమ్ ।
స్వరోచిషోల్లాసితకేశపాశం
మహేశి చూడామణిమర్పయామి ॥ ౪౧॥
త్వామాశ్రయద్భిః కబరీతమిస్రై-
ర్బన్దీకృతం ద్రాగివ భానుబిమ్బమ్ ।
మృడాని చూడామణిమాదధానం
వన్దామహే తావతముత్తమాఙ్గమ్ ॥ ౪౨॥
స్వమధ్యనద్ధహాటకస్ఫురన్మణిప్రభాకులం
విలమ్బిమౌక్తికచ్ఛటావిరాజితం సమన్తతః ।
నిబద్ధలక్షచక్షుషా భవేన భూరి భావితం
సమర్పయామి భాస్వరం భవాని ఫాలభూషణమ్ ॥ ౪౩॥
మీనామ్భోరుహఖఞ్జరీటసుషమావిస్తారవిస్మారకే
కుర్వాణే కిల కామవైరిమనసః కన్దర్పబాణప్రభామ్ ।
మాధ్వీపానమదారుణేఽతిచపలే దీర్ఘే దృగమ్భోరుహే
దేవి స్వర్ణశలాకయోర్జితమిదం దివ్యాఞ్జనం దీయతామ్ ॥ ౪౪॥
మధ్యస్థారుణరత్నకాన్తిరుచిరాం ముక్తాముగోద్భాసితాం
దైవాద్భార్గవజీవమధ్యగరవేర్లక్ష్మీమధః కుర్వతీమ్ ।
ఉత్సిక్తాధరబిమ్బకాన్తివిసరైర్భౌమీభవన్మౌక్తికాం
మద్దత్తమురరీకురుష్వ గిరిజే నాసావిభూషామిమామ్ ॥ ౪౫॥
ఉడుకృతపరివేషస్పర్ధయా శీతభానో-
రివ విరచితదేహద్వన్ద్వమాదిత్యబిమ్బమ్ ।
అరుణమణిసముద్యత్ప్రాన్తవిభ్రాజిముక్తం
శరవసి పరినిధేహి స్వర్ణతాటఙ్కయుగ్మమ్ ॥ ౪౬॥
మరకతవరపద్మరాగహీరో-
త్థితగులికాత్రితయావనద్ధమధ్యమ్ ।
వితతవిమలమౌక్తికం చ
కణ్ఠాభరణమిదం గిరిజే సమర్పయామి ॥ ౪౭॥
నానాదేశసముత్త్థితైర్మణిగణప్రోద్యత్ప్రభామణ్డల-
వ్యాప్తైరాభరణైర్విరాజితగలాం ముక్తాచ్ఛటాలఙ్కృతామ్ ।
మధ్యస్థారుణరత్నకాన్తిరుచిరాం ప్రాన్తస్థముక్తాఫల-
వ్రాతామమ్బ చతుష్కికాం పరశివే వక్షఃస్థలే స్థాపయ ॥ ౪౮॥
అన్యోన్యం ప్లావయన్తీ సతతపరిచలత్కాన్తికల్లోలజాలైః
కుర్వాణా మజ్జదన్తఃకరణవిమలతాం శోభితేవ త్రివేణీ ।
ముక్తాభిః పద్మరాగైర్మరకతమణిభిర్నిర్మితా దీప్యమానై-
ర్నిత్యం హారత్రయీ తే పరశివరసికే చేతసి ద్యోతతాం నః ॥ ౪౯॥
కరసరసిజనాలే విస్ఫురత్కాన్తిజాలే
విలసదమలశోభే చఞ్చదీశాక్షిలోభే ।
వివిధమణిమయూఖోద్భాసితం దేవి దుర్గే
కనకకటకయుగ్మం బాహుయుగ్మే నిధేహి ॥ ౫౦॥
వ్యాలమ్బమానసితపట్టకగుచ్ఛశోభి
స్ఫూర్జన్మణీఘటితహారవిరోచమానమ్ ।
మాతర్మహేశమహిలే తవ బాహుమూలే
కేయూరకద్వయమిదం వినివేశయామి ॥ ౫౧॥
వితతనిజమయూఖైర్నిర్మితామిన్ద్రనీలై-
ర్విజితకమలనాలాలీనమత్తాలిమాలామ్ ।
మణిగణఖచితాభ్యాం కఙ్కణాభ్యాముపేతాం
కలయ వలయరాజీం హస్తమూలే మహేశి ॥ ౫౨॥
నీలపట్టమృదుగుచ్ఛశోభితా-
బద్ధనైకమణిజాలమఞ్జులామ్ ।
అర్పయామి వలయాత్పురఃసరే
విస్ఫురత్కనకతైతృపాలికామ్ ॥ ౫౩॥
ఆలవాలమివ పుష్పధన్వనా
బాలవిద్రుమలతాసు నిర్మితమ్ ।
అఙ్గులీశు వినిధీయతాం శనై-
రఙ్గులీయకమిదం మదర్పితమ్ ॥ ౫౪॥
విజితహరమనోభూమత్తమాతఙ్గకుమ్భ-
స్థలవిలులితకూజత్కిఙ్కిణీజాలతుల్యామ్ ।
అవిరతకలనదైరీశచేతో హరన్తీం
వివిధమణినిబద్ధాం మేఖలామర్పయామి ॥ ౫౫॥
వ్యాలమ్బమానవరమౌక్తికగుచ్ఛశోభి
విభ్రాజిహాటకపుటద్వయరోచమానమ్ ।
హేమ్నా వినిర్మితమనేకమణిప్రబన్ధం
నీవీనిబన్ధనగుణం వినివేదయామి ॥ ౫౬॥
వినిహతనవలాక్షాపఙ్కబాలాతపౌఘే
మరకతమణిరాజీమఞ్జుమఞ్జీరఘోషే ।
అరుణమణిసముద్యత్కాన్తిధారావిచిత్ర-
స్తవ చరణసరోజే హంసకః ప్రీతిమేతు ॥ ౫౭॥
నిబద్ధశితిపట్టకప్రవరగుచ్ఛసంశోభితాం
కలక్వణితమఞ్జులాం గిరిశచిత్తసంమోహనీమ్ ।
అమన్దమణిమణ్డలీవిమలకాన్తికిమ్మీరితాం
నిధేహి పదపఙ్కజే కనకఘుఙ్ఘురూమమ్బికే ॥ ౫౮॥
విస్ఫురత్సహజరాగరఞ్జితే
శిఞ్జితేన కలితాం సఖీజనైః ।
పద్మరాగమణినూపురద్వయీ-
మర్పయామి తవ పాదపఙ్కజే ॥ ౫౯॥
పదామ్బుజముపాసితుం పరిగతేన శీతాంశునా
కృతాం తనుపరమ్పరామివ దినాన్తరాగారుణామ్ ।
మహేశి నవయావకద్రవభరేణ శోణీకృతాం
నమామి నఖమణ్డలీం చరణపఙ్కజస్థాం తవ ॥ ౬౦॥
ఆరక్తశ్వేతపీతస్ఫురదురుకసుమైశ్చిత్రితాం పట్టసూత్రై-
ర్దేవస్త్రీభిః ప్రయత్నాదగరుసముదితైర్ధూపితాం దివ్యధూపైః ।
ఉద్యద్గన్ధాన్ధపుష్పంధయనివహసమారబ్ధఝాఙ్కారగీతాం
చఞ్చత్కహ్లారమాలాం పరశివరసికే కణ్ఠపీఠేఽర్పయామి ॥ ౬౧॥
గృహాణ పరమామృతం కనకపాత్రసంస్థాపితం
సమర్పయ ముఖామ్బుజే విమలవీటికామమ్బికే ।
విలోకయ ముఖామ్బుజం ముకురమణ్డలే నిర్మలే
నిధేహి మణిపాదుకోపరి పదామ్బుజం సున్దరి ॥ ౬౨॥
ఆలమ్బ్య స్వసఖీం కరేణ శనకైః సింహాసనాదుత్థితా
కూజన్మన్దమరాలమఞ్జులగతిప్రోల్లాసిభూషామ్బర ।
ఆనన్దప్రతిపాదకైరుపనిషద్వాక్యైః స్తుతా వేధసా
మచ్చిత్తే స్థిరతాముపైతు గిరిజా యాన్తీ సభామణ్డపమ్ ॥ ౬౩॥
చలన్త్యామమ్బాయాం ప్రచలతి సమస్తే పరిజనే
సవేగం సంయాతే కనకలతికాలఙ్కృతిభరే ।
సమతాదుత్తాలస్ఫురితపదసమ్పాతజనితై-
ర్ఝణత్కారైస్తారైర్ఝణఝణితమాసీన్మణిగృహమ్ ॥ ౬౪॥
చఞ్చద్వేత్రకరాభిరఙ్గవిలసద్భూషామ్బరాభిః పురో-
యన్తీభిః పరిచారికాభిరమరవ్రాతే సముత్సారితే ।
రుద్ధే నిర్జరసున్దరీభిరభితః కక్షాన్తరే నిర్గతం
వన్దే నన్దితశమ్భు నిర్మలచిదానన్దైకరూపం మహః ॥ ౬౫॥
వేధాః పాదతలే పతత్యయమసౌ విష్ణుర్నమత్యగ్రతః
శమ్భుర్దేహి దృగఞ్చలం సురపతిం దూరస్థమాలోకయ ।
ఇత్యేవం పరిచారికాభిరుదితే సంమాననాం కుర్వతీ
దృగ్ద్వన్ద్వేన యథోచితం భగవతీ భూయాద్విభూత్యై మమ ॥ ౬౬॥
మన్దం చారణసున్దరీభిరభితో యాన్తీభిరుత్కణ్ఠయా
నామోచ్చారణపూర్వకం ప్రతిదిశం ప్రత్యేకమావేదితాత్ ।
వేగాదక్షిపథం గతాన్సురగణానాలోకయన్తీ శనై-
ర్దిత్సన్తీ చరణామ్బుజం పథి జగత్పాయాన్మహేశప్రియా ॥ ౬౭॥
అగ్రే కేచన పార్శ్వయోః కతిపయే పృష్ఠే పరే ప్రస్థితా
ఆకాశే సమవస్థితాః కతిపయే దిక్షు స్థితాశ్చాపరే ।
సంమర్దం శనకైరపాస్య పురతో దణ్డప్రణామాన్ముహుః
కుర్వాణాః కతిచిత్సురా గిరిసుతే దృక్పాతమిచ్ఛన్తి తే ॥ ౬౮॥
అగ్రే గాయతి కింనరీ కలపదం గన్ధర్వకాన్తాః శనై-
రాతోద్యాని చ వాదయన్తి మధురం సవ్యాపసవ్యస్థితాః ।
కూజన్నూపురనాద మఞ్జు పురతో నృత్యన్తి దివ్యాఙ్గనా
గచ్ఛన్తః పరితః స్తువన్తి నిగమస్తుత్యా విరిఞ్చ్యాదయః ॥ ౬౯॥
కస్మైచిత్సుచిరాదుపాసితమహామన్త్రౌఘసిద్ధిం క్రమా-
దేకస్మై భవనిఃస్పృహాయ పరమానన్దస్వరూపాం గతిమ్ ।
అన్యస్మై విషయానురక్తమనసే దీనాయ దుఃఖాపహం
ద్రవ్యం ద్వారసమాశ్రితాయ దదతీం వన్దామహే సున్దరీమ్ ॥ ౭౦॥
నమ్రీభూయ కృతాఞ్జలిప్రకటితప్రేమప్రసన్నాననే
మన్దం గచ్ఛతి సంనిధౌ సవినయాత్సోత్కణ్ఠమోఘత్రయే ।
నానామన్త్రగణం తదర్థమఖిలం తత్సాధనం తత్ఫలం
వ్యాచక్షాణముదగ్రకాన్తి కలయే యత్కిఞ్చిదాద్యం మహః ॥ ౭౧॥
తవ దహనసదృక్షైరీక్షణైరేవ చక్షు-
ర్నిఖిలపశుజనానాం భీషయద్భీషణాస్యమ్ ।
కృతవసతి పరేశప్రేయసి ద్వారి నిత్యం
శరభమిథునముచ్చైర్భక్తియుక్తో నతోఽస్మి ॥ ౭౨॥
కల్పాన్తే సరసైకదాసముదితానేకార్కతుల్యప్రభాం
రత్నస్తమ్భనిబద్ధకాఞ్చనగుణస్ఫూర్జద్వితానోత్తమామ్ ।
కర్పూరాగరుగర్భవర్తికలికాప్రాప్తప్రదీపావలీం
శ్రీచక్రాకృతిముల్లసన్మణిగణాం వన్దామహే వేదికామ్ ॥ ౭౩॥
స్వస్థానస్థితదేవతాగణవృతే బిన్దౌ ముదా స్థాపితం
నానారత్నవిరాజిహేమవిలసత్కాన్తిచ్ఛటాదుర్దినమ్ ।
చఞ్చత్కౌసుమతూలికాసనయుతం కామేశ్వరాధిష్ఠితం
నిత్యానన్దనిదానమమ్బ సతతం వన్దే చ సింహాసనమ్ ॥ ౭౪॥
వదద్భిరభితో ముదా జయ జయేతి బృన్దారకైః
కృతాఞ్జలిపరమ్పరా విదధతి కృతార్థా దృశా ।
అమన్దమణిమణ్డలీఖచితహేమసింహాసనం
సఖీజనసమావృతం సమధితిష్ఠ దాక్షాయణి ॥ ౭౫॥
కర్పూరాదికవస్తుజాతమఖిలం సౌవర్ణభృఙ్గారకం
తామ్బూలస్య కరణ్డకం మణిమయం చైలాఞ్చలం దర్పణమ్ ।
విస్ఫూర్జన్మణిపాదుకే చ దధతీః సింహాసనస్యాభిత-
స్తిష్ఠన్తీః పరిచారికాస్తవ సదా వన్దామహే సున్దరి ॥ ౭౬॥
త్వదమలవపురుద్యత్కాన్తికల్లోలజాలైః
స్ఫుటమివ దధతీభిర్బాహువిక్షేపలీలామ్ ।
ముహురపి చ విధూతే చామరగ్రాహిణీభిః
సితకరకరశుభ్రే చామరే చాలయామి ॥ ౭౭॥
ప్రాన్తస్ఫురద్విమలమౌక్తికగుచ్ఛజాలం
చఞ్చన్మహామణివిచిత్రితహేమదణ్డమ్ ।
ఉద్యత్సహస్రకరమణ్డలచారు హేమ-
చ్ఛత్రం మహేశమహిలే వినివేశయామి ॥ ౭౮॥
ఉద్యత్తావకదేహకాన్తిపటలీసిన్దూరపూరప్రభా-
శోణీభూతముదగ్రలోహితమణిచ్ఛేదానుకారిచ్ఛవి ।
దూరాదాదరనిర్మితాఞ్జలిపుటైరాలోకమానం సుర-
వ్యూహైః కాఞ్చనమాతపత్రమతులం వన్దామహే సున్దరమ్ ॥ ౭౯॥
సన్తుష్టాం పరమామృతేన విలసత్కామేశ్వరాఙ్కస్థితాం
పుష్పౌఘైరభిపూజితాం భగవతీం త్వాం వన్దమానా ముదా ।
స్ఫూర్జత్తావకదేహరశ్మికలనాప్రాప్తస్వరూపాభిదాః
శ్రీచక్రావరణస్థితాః సవినయం వన్దామహే దేవతాః ॥ ౮౦॥
ఆధారశక్త్యాదికమాకలయ్య
మధ్యే సమస్తాధికయోగినీం చ ।
మిత్రేశనాథాదికమత్ర నాథ-
చతుష్టయం శైలసుతే నతోఽస్మి ॥ ౮౧॥
త్రిపురాసుధార్ణవాసన-
మారభ్య త్రిపురమాలినీ యావత్ ।
ఆవరణాష్టకసంస్థిత-
మాసనషట్కం నమామి పరమేశి ॥ ౮౨॥
ఈశానే గణపం స్మరామి విచరద్విఘ్నాన్ధకారచ్ఛిదం
వాయవ్యే వటుకం చ కజ్జలరుచిం వ్యాలోపవీతాన్వితమ్ ।
నైరృత్యే మహిషాసురప్రమథినీం దుర్గాం చ సమ్పూజయ-
న్నాగ్నేయేఽఖిలభక్తరక్షణపరం క్షేత్రాధి నాథం భజే ॥ ౮౩॥
ఉడ్యానజాలన్ధరకామరూప-
పీఠానిమాన్పూర్ణగిరిప్రసక్తాన్ ।
త్రికోణదక్షాగ్రిమసవ్యభాగ-
మధ్యస్థితాన్సిద్ధికరాన్నమామి ॥ ౮౪॥
లోకేశః పృథివీపతిర్నిగదితో విష్ణుర్జలానాం ప్రభు-
స్తేజోనాథ ఉమాపతిశ్చ మరుతామీశస్తథా చేశ్వరః ।
ఆకాశాధిపతిః సదాశివ ఇతి ప్రేతాభిధామాగతా-
నేతాంశ్చక్రబహిఃస్థితాన్సురగణాన్వన్దామహే సాదరమ్ ॥ ౮౫॥
తారానాథకలాప్రవేశనిగమవ్యాజాద్గతాసుప్రథం
త్రైలోక్యే తిథిషు ప్రవర్తితకలాకాష్ఠాదికాలక్రమమ్ ।
రత్నాలఙ్కృతిచిత్రవస్త్రలలితం కామేశ్వరీపూర్వకం
నిత్యాషోడశకం నమామి లసితం చక్రాత్మనోరన్తరే ॥ ౮౬॥
హృది భావితదైవతం ప్రయత్నా-
భ్యుపదేశానుగృహీతభక్తసఙ్ఘమ్ ।
స్వగురుక్రమసంజ్ఞచక్రరాజ-
స్థితమోఘత్రయమానతోఽస్మి మూర్ధ్నా ॥ ౮౭॥
హృదయమథ శిరః శిఖాఖిలాద్యే
కవచమథో నయనత్రయం చ దేవి ।
మునిజనపరిచిన్తిత తథాస్త్రం
స్ఫురతు సదా హృదయే షడఙ్గమేతత్ ॥ ౮౮॥
త్రైలోక్యమోహనమితి ప్రథితే తు చక్రే
చఞ్చద్విభూషణగణత్రిపురాధివాసే ।
రేఖాత్రయే స్థితవతీరణిమాదిసిద్ధీ-
ర్ముద్రా నమామి సతతం ప్రకటాభిధాస్తాః ॥ ౮౯॥
సర్వాశాపరిపూరకే వసుదలద్వన్ద్వేన విభ్రాజితే
విస్ఫూర్జన్త్రిపురేశ్వరీనివసతౌ చక్రే స్థితా నిత్యశః ।
కామాకర్షణికాదయో మణిగణభ్రాజిష్ణుదివ్యామ్బరా
యోగిన్యః ప్రదిశన్తు కాఙ్క్షితఫలం విఖ్యాతగుప్తాభిధాః ॥ ౯౦॥
మహేశి వసుభిర్దలైర్లసతి సర్వసంక్షోభణే
విభూషణగణస్ఫురన్త్రిపురసున్దరీసద్మని ।
అనఙ్గకుసుమాదయో వివిధభూషణోద్భాసితా
దిశన్తు మమ కాఙ్క్షితం తనుతరాశ్చ గుప్తాభిధాః ॥ ౯౧॥
లసద్యుగదృశారకే స్ఫురతి సర్వసౌభాగ్యదే
శుభాభరణభూషితత్రిపురవాసినీమన్దిరే ।
స్థితా దధతు మఙ్గలం సుభగసర్వసంక్షోభిణీ-
ముఖాః సకలసిద్ధయో విదితసమ్ప్రదాయాభిధాః ॥ ౯౨॥
బహిర్దశారే సర్వార్థసాధకే త్రిపురాశ్రయాః ।
కులకౌలాభిధాః పాన్తు సర్వసిద్ధిప్రదాయికాః ॥ ౯౩॥
అన్తఃశోభిదశారకేఽతిలలితే సర్వాదిరక్షాకరే
మాలిన్యా త్రిపురాద్యయా విరచితావాసే స్థితం నిత్యశః ।
నానారత్నవిభూషణం మణిగణభ్రాజిష్ణు దివ్యామ్బరం
సర్వజ్ఞాదికశక్తిబృన్దమనిశం వన్దే నిగర్భాభిధమ్ ॥ ౯౪॥
సర్వరోగహరేఽష్టారే త్రిపురాసిద్ధయాన్వితే ।
రహస్యయోగినీర్నిత్యం వశిన్యాద్యా నమామ్యహమ్ ॥ ౯౫॥
చూతాశోకవికాసికేతకరజఃప్రోద్భాసినీలామ్బుజ-
ప్రస్ఫూర్జన్నవమల్లికాసముదితైః పుష్పైః శరాన్నిర్మితాన్ ।
రమ్యం పుష్పశరాసనం సులలితం పాశం తథా చాఙ్కుశం
వన్దే తావకమాయుధం పరశివే చక్రాన్తరాలేస్థితమ్ ॥ ౯౬॥
త్రికోణ ఉదితప్రభే జగతి సర్వసిద్ధిప్రదే
యుతే త్రిపురయామ్బయా స్థితవతీ చ కామేశ్వరీ ।
తనోతు మమ మఙ్గలం సకలశర్మ వజ్రేశ్వరీ
కరోతు భగమాలినీ స్ఫురతు మామకే చేతసి ॥ ౯౭॥
సర్వానన్దమయే సమస్తజగతామాకాఙ్క్షితే బైన్దవే
భైరవ్యా త్రిపురాద్యయా విరచితావాసే స్థితా సున్దరీ ।
ఆనన్దోల్లసితేక్షణా మణిగణభ్రాజిష్ణుభూషామ్బరా
విస్ఫూర్జద్వదనా పరాపరరహః స మాం పాతు యోగినీ ॥ ౯౮॥
ఉల్లసత్కనకకాన్తిభాసురం
సౌరభస్ఫురణవాసితామ్బరమ్ ।
దూరతః పరిహృతం మధువ్రతై-
రర్పయామి తవ దేవి చమ్పకమ్ ॥ ౯౯॥
వైరముద్ధతమపాస్య శమ్భునా
మస్తకే వినిహితం కలాచ్ఛలాత్ ।
గన్ధలుబ్ధమధుపాశ్రితం సదా
కేతకీకుసుమమర్పయామి తే ॥ ౧౦౦॥
చూర్ణీకృతం ద్రాగివ పద్మజేన
త్వదాననస్పర్ధిసుధాంశుబిమ్బమ్ ।
సమర్పయామి స్ఫుటమఞ్జలిస్థం
వికాసిజాతీకుసుమోత్కరం తే ॥ ౧౦౧॥
అగరుబహలధూపాజస్రసౌరభ్యరమ్యాం
మరకతమణిరాజీరాజిహారిస్రగాభామ్ ।
దిశి విదిశి విసరద్గన్ధలుబ్ధాలిమాలాం
వకులకుసుమమాలాం కణ్ఠపీఠేఽర్పయామి ॥ ౧౦౨॥
ఈఙ్కారోర్ధ్వగబిన్దురాననమధోబిన్దుద్వయం చ స్తనౌ
త్రైలోక్యే గురుగమ్యమేతదఖిలం హార్దం చ రేఖాత్మకమ్ ।
ఇత్థం కామకలాత్మికాం భగవతీమన్తః సమారాధయ-
న్నానన్దామ్బుధిమజ్జనే ప్రలభతామానన్దథుం సజ్జనః ॥ ౧౦౩॥
ధూపం తేఽగరుసంభవం భగవతి ప్రోల్లాసిగన్ధోద్ధురం
దీపం చైవ నివేదయామి మహసా హార్దాన్ధకారచ్ఛిదమ్ ।
రజస్వర్ణవినిర్మితేషు పరితః పాత్రేషు సంస్థాపితం
నైవేద్యం వినివేదయామి పరమానన్దాత్మికే సున్దరి ॥ ౧౦౪॥
జాతీకోరకతుల్యమోదనమిదం సౌవర్ణపాత్రే స్థితం
శుద్ధాన్నం శుచి ముద్గమాషచణకోద్భూతాతథా సూపకాః ।
ప్రాజ్యం మాహిషమాజ్యముత్తమమిదం హైవంగవీనం పృథ-
క్పాత్రేషు ప్రతిపాదితం పరశివే తత్సర్వమఙ్గీకురు ॥ ౧౦౫॥
శిమ్బీసూరణశాకబిమ్బబృహతీకూశ్మాణ్డకోశాతకీ-
వృన్తాకాని పటోలకాని మృదునా సంసాధితాన్యగ్నినా ।
సమ్పన్నాని చ వేసవారవిసరైర్దివ్యాని భక్త్యా కృతా-
న్యగ్రే తే వినివేదయామి గిరిజే సౌవర్ణపాత్రవ్రజే ॥ ౧౦౬॥
నిమ్బూకార్ద్రకచూతకన్దకదలీకౌశాతకీకర్కటీ-
ధాత్రీబిల్వకరీరకైర్విరచితాన్యానన్దచిద్విగ్రహే ।
రాజీభిః కటుతైలసైన్ధవహరిద్రాభిః స్థితాన్పాతయే
సంధానాని నివేదయామి గిరిజే భూరిప్రకారాణి తే ॥ ౧౦౭॥
సితయాఞ్చితలడ్డుకవ్రజా-
న్మృదుపూపాన్మృదులాశ్చ పూరికాః ।
పరమాన్నమిదం చ పార్వతి
ప్రణయేన ప్రతిపాదయామి తే ॥ ౧౦౮॥
దిగ్ధమేతదనలే సుసాధితం
చన్ద్రమణ్డలనిభం తథా దధి ।
ఫాణితం శిఖరిణీం సితాసితాం
సర్వమమ్బ వినివేదయామి తే ॥ ౧౦౯॥
అగ్రే తే వినివేద్య సర్వమమితం నైవేద్యమఙ్గీకృతం
జ్ఞాత్వా తత్త్వచతుష్టయం ప్రథమతో మన్యే సుతృప్తాం తతః ।
దేవీం త్వాం పరిశిష్టమమ్బ కనకామత్రేషు సంస్థాపితం
శక్తిభ్యః సముపాహారామి సకలం దేవేశి శమ్భుప్రియే ॥ ౧౧౦॥
వామేన స్వర్ణపాత్రీమనుపమపరమాన్నేన పూర్ణాం దధానా-
మన్యేన స్వర్ణదర్వీం నిజజనహృదయాభీష్టదాం ధారయన్తీమ్ ।
సిన్దూరారక్తవస్త్రాం వివిధమణిలసద్భూషణాం మేచకాఙ్గీం
తిష్ఠన్తీమగ్రతస్తే మధుమదముదితామన్నపూర్ణాం నమామి ॥ ౧౧౧॥
పఙ్క్త్యోపవిష్టాన్పరితస్తు చక్రం
శక్త్యా స్వయాలిఙ్గితవామభాగాన్ ।
సర్వోపచారైః పరిపూజ్య భక్త్యా
తవామ్బికే పారిషదాన్నమామి ॥ ౧౧౨॥
పరమామృతమత్తసున్దరీ-
గణమధ్యస్థితమర్కభాసురమ్ ।
పరమామృతఘూర్ణితేక్షణం
కిమపి జ్యోతిరుపాస్మహే పరమ్ ॥ ౧౧౩॥
దృశ్యతే తవ ముఖామ్బుజం శివే
శ్రూయతే స్ఫుటమనాహతధ్వనిః ।
అర్చనే తవ గిరామగోచరే
న ప్రయాతి విషయాన్తరం మనః ॥ ౧౧౪॥
త్వన్ముఖామ్బుజవిలోకనోల్లస-
త్ప్రేమనిశ్చలవిలోచనద్వయీమ్ ।
ఉన్మనీముపగతాం సభామిమాం
భావయామి పరమేశి తావకీమ్ ॥ ౧౧౫॥
చక్షుః పశ్యతు నేహ కించన పరం ఘ్రాణం న వా జిఘ్రతు
శ్రోత్రం హన్త శ్రుణోతు న త్వగపి న స్పర్శం సమాలమ్బతామ్ ।
జిహ్వా వేత్తు న వా రసం మమ పరం యుష్మత్స్వరూపామృతే
నిత్యానన్దవిఘూర్ణమాననయనే నిత్యం మనో మజ్జతు ॥ ౧౧౬॥
యస్త్వాం పశ్యతి పార్వతి ప్రతిదినం ధ్యానేన తేజోమయీం
మన్యే సున్దరి తత్త్వమేతదఖిలం వేదేషు నిష్ఠాం గతమ్ ।
యస్తస్మిన్సమయే తవార్చనవిధావానన్దసాన్ద్రాశయో
యాతోఽహం తదభిన్నతాం పరశివే సోఽయం ప్రసాదస్తవ ॥ ౧౧౭॥
గణాధినాథం వటుకం చ యోగినీః
క్షేత్రాధినాథం చ విదిక్చతుష్టయే ।
సర్వోపచారైః పరిపూజ్య భక్తితో
నివేదయామో బలిముక్తయుక్తిభిః ॥ ౧౧౮॥
వీణాముపాన్తే ఖలు వాదయన్త్యై
నివేద్య శేషం ఖలు శేషికాయై ।
సౌవర్ణభృఙ్గారవినిర్గతేన
జలేన శుద్ధాచమనం విధేహి ॥ ౧౧౯॥
తామ్బూలం వినివేదయామి విలసత్కర్పూరకస్తూరికా-
జాతీపూగలవఙ్గచూర్ణఖదిరైర్భక్త్యా సముల్లాసితమ్ ।
స్ఫూర్జద్రత్నసముద్గకప్రణిహితం సౌవర్ణపాత్రే స్థితై-
ర్దీపైరుజ్జ్వలమాన్నచూర్ణరచితైరారార్తికం గృహ్యతామ్ ॥ ౧౨౦॥
కాచిద్గాయతి కింనరీ కలపదం వాద్యం దధానోర్వశీ
రమ్భా నృత్యతి కేలిమఞ్జులపదం మాతః పురస్తాత్తవ ।
కృత్యం ప్రోజ్ఝ్య సురస్త్రియో మధుమదవ్యాఘూర్ణమానేక్షణం
నిత్యానన్దసుధామ్బుధిం తవ ముఖం పశ్యన్తి దృశ్యన్తి చ ॥ ౧౨౧॥
తామ్బూలోద్భాసివక్త్రైస్త్వదమలవదనాలోకనోల్లాసినేత్రై-
శ్చక్రస్థైః శక్తిసఙ్ఘైః పరిహృతవిషయాసఙ్గమాకర్ణ్యమానమ్ ॥ ౧౨౨॥
అర్చావిధౌ జ్ఞానలవోఽపి దూరే
దూరే తదాపాదకవస్తుజాతమ్ ।
ప్రదక్షిణీకృత్య తతోఽర్చనం తే
పఞ్చోపచారాత్మకమర్పయామి ॥ ౧౨౩॥
యథేప్సితమనోగతప్రకటితోపచారార్చితం
నిజావరణదేవతాగణవృతాం సురేశస్థితామ్ ।
కృతాఞ్జలిపుటో ముహుః కలితభూమిరష్టాఙ్గకై-
ర్నమామి భగవత్యహం త్రిపురసున్దరి త్రాహి మామ్ ॥ ౧౨౪॥
విజ్ఞప్తీరవధేహి మే సుమహతా యత్నేన తే సంనిధిం
ప్రాప్తం మామిహ కాన్దిశీకమధునా మాతర్న దూరీకురు ।
చిత్తం త్వత్పదభావనే వ్యభిచరేద్దృగ్వాక్చ మే జాతు చే-
త్తత్సౌమ్యే స్వగుణైర్బధాన న యథా భూయో వినిర్గచ్ఛతి ॥ ౧౨౫॥
క్వాహం మన్దమతిః క్వ చేదమఖిలైరేకాన్తభక్తైః స్తుతం
ధ్యాతం దేవి తథాపి తే స్వమనసా శ్రీపాదుకాపూజనమ్ ।
కాదాచిత్కమదీయచిన్తనవిధౌ సన్తుష్టయా శర్మదం
స్తోత్రం దేవతయా తయా ప్రకటితం మన్యే మదీయాననే ॥ ౧౨౬॥
నిత్యార్చమిదం చిత్తే భావ్యమానం సదా మయా ।
నిబద్ధం వివిధైః పద్యైరనుగృహ్ణాతు సున్దరీ ॥ ౧౨౭॥
ఇతి శ్రీమత్పరమహంసపరివ్రాజకాచార్యస్య
శ్రీగోవిన్దభగవత్పూజ్యపాదశిష్యస్య
శ్రీమచ్ఛఙ్కరభగవతః కృతౌ
త్రిపురసున్దరీమానసపూజాస్తోత్రం
సమ్పూర్ణమ్ ॥
Comments
Post a Comment