శ్రీత్రిపురసున్దరీ విజయస్తవః
॥ శ్రీత్రిపురసున్దరీ విజయస్తవః ॥
॥ క॥
కల్పాన్తోదిత-చణ్డ-భాను-విలసద్-దేహ-ప్రభా-మణ్డితా
కాలామ్భోద-సమాన-కున్తల-భరా కారుణ్య-వారాం నిధిః ।
కాద్యర్ణాఙ్కిత-మన్త్ర-రాజ-విలసత్-కూట-త్రయోపాసితా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧॥
॥ ఏ॥
ఏతత్-ప్రాభవ-శాలినీతి నిగమైరద్యాప్యనాలోచితా
హేమామ్భోజ-ముఖీ చలత్-కువలయ-ప్రస్పర్ధమానేక్షణా ।
ఏణాఙ్కాంశ-సమాన-ఫాల-ఫలక-ప్రోల్లాసి-కస్తూరికా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౨॥
॥ ఈ॥
ఈషత్-ఫుల్ల-కదమ్బ-కుణ్డల-మహా-లావణ్య-గర్వాపహా
స్నిగ్ధ-స్వచ్ఛ-సుదన్త-కాన్తి-విలసన్మన్ద-స్మితాఽలంకృతా ।
ఈశిత్వాద్యఖిలేష్ట-సిద్ధి-ఫలదా భక్త్యా నతానాం సదా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౩॥
॥ ల॥
లక్ష్యాలక్ష్యావలగ్న-దేశ-విలసద్-రోమావలీ-వల్లరీ
వృత్త-స్నిగ్ధ-ఫల-ద్వయ-భ్రమ-కరోత్తుఙ్గ-స్తనీ సున్దరీ ।
రక్తాశోక-శుభ-ప్రపాటల-దుకూలాచ్ఛాదితాఙ్గీ ముదా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౪॥
॥ హ్రీం॥
హ్రీంఙ్కారీ సుర-వాహినీ జల-గభీరావర్తనాభిర్ధన-
శ్రోణీ-మణ్డల-భార-మన్ద గమనా-కాఞ్చీ-కలాపోజ్జ్వలా ।
శుణ్డాదణ్డ-సువర్ణ-వర్ణ-కదలీ-కాణ్డోపమోరు-ద్వయీ
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౫॥
॥ హ॥
హస్త-ప్రోజ్జ్వలదిక్షు-కార్ముక-లసత్-పుష్పేషు-పాశాంకుశా
హ్యాద్యర్ణాఙ్కిత-మన్త్ర-రాజ-నిలయా హారాదిభిర్భూషితా ।
హస్త-ప్రాన్త-రణత్-సువర్ణ-వలయా హర్యక్ష-సమ్పూజితా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౬॥
॥ స॥
సంరక్తామ్బుజ-పాద-యుగ్మ-విలసన్మఞ్జు-క్వణన్నూపురా
సంసారార్ణవ-తారణైక-తరణిర్లావణ్య-వారాం నిధిః ।
లీలా-లోల-తమం శుకం మధురయా సంలాలయన్తీ గిరా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౭॥
॥ క॥
కల్యాణీ కరుణా-రసార్ద్ర-హృదయా కల్యాణ-సన్దాయినీ
కాద్యర్ణాఙ్కిత-మన్త్ర-లక్షిత-తనుస్తన్వీ తమో-నాశినీ ।
కామేశాఙ్క-విలాసినీ కల-గిరామావాస-భూమిః శివా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౮॥
॥ హ॥
హన్తుం దానవ-పుఙ్గవం రణ-భువి ప్రోచ్చణ్డ-భణ్డాభిధం
హర్యక్షాద్యమరార్థితా భగవతీ దివ్యాం తనూమాశ్రితా ।
శ్రీమాతా లలితేత్యచిన్త్య-విభవైర్నామ్నాం సహస్రైః స్తుతా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౯॥
॥ ల॥
లక్ష్మీర్వాగ-గజాదిభిర్బహు-విధైః రూపైః స్తుతాఽపి స్వయం
నీ-రూపా గుణ-వర్జితా త్రి-జగతాం మాతా చ చిద్-రూపిణీ ।
భక్తానుగ్రహ-కారణేన లలితం రూపం సమాసాదితా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౦॥
॥ హ్రీం॥
హ్రీఙ్కారైక-పరాయణార్త-జనతా-సంరక్షణే దీక్షితా
హార్దాసం తమసం వ్యపోహిత-మలం భూష్ణుర్హర-ప్రేయసీ
హత్యాది-ప్రకటాఘ-సఙ్ఘ-దలనే దక్షా చ దాక్షాయణీ
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౧॥
॥ స॥
సర్వానన్ద-మయీ సమస్త-జగతామానన్ద-సన్దాయినీ
సర్వోత్తుఙ్గ-సువర్ణ-శైల-నిలయా సా సార-సాక్షీ సతీ ।
సర్వైర్యోగి-చయైః సదైవ విచితా సామ్రాజ్య-దాన-క్షమా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౨॥
॥ క॥
కన్యా-రూప-ధరా గలాబ్జ-విలసన్ముక్తా-లతాఽలంకృతా
కాది-క్షాన్తమను-ప్రవిష్ట-హృదయా కల్యాణ-శీలాన్వితా ।
కల్పాన్తోద్భట-తాణ్డవ-ప్రముదితా శ్రీకామ-జిత్-సాక్షిణీ
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౩॥
॥ ల॥
లక్ష్యా భక్తి-రసార్ద్ర-హృత్-సరసిజే సద్భిః సదాఽఽరాధితా
సాన్ద్రానన్ద-మయీ సుధాకర-కలా ఖణ్డోజ్జ్వలన్మౌలికా ।
శర్వాణీ శరణాగతాఽఽర్తి-శమినీ సచ్చిన్మయీ సర్వదా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౪॥
॥ హ్రీం॥
హ్రీఙ్కార-త్రయ-సమ్పుటాఽతి-మహతా మన్త్రేణ సమ్పూజితా
హోత్రీ చన్ద్ర-సమీరణాఽగ్ని-జల-భూ-భాస్వన్నభో-రూపిణీ ।
హంసః సోహమితి ప్రకృష్ట-ధిషణైరారాధితా యోగిభిః
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౫॥
॥ శ్రీం॥
శ్రీఙ్కారామ్బుజ-హంసికాఽఽశ్రిత-జన-క్షేమఙ్కరీ శఙ్కరీ
శృఙ్గారైక-రసాకరస్య మదనస్యోజ్జీవికా-వల్లరీ ।
శ్రీకామేశరహః-సఖీ చ లలితా శ్రీమద్-గుహాఽఽరాధితా
శ్రీచక్రాధి-నివాసినీ విజయతే శ్రీరాజ-రాజేశ్వరీ ॥ ౧౬॥
ఇతి ।
Comments
Post a Comment