శ్రీత్రిపురసున్దరీ సాన్నిధ్యస్తవః
॥ శ్రీత్రిపురసున్దరీ సాన్నిధ్యస్తవః ॥
॥ క॥
కల్ప-భాను సమాన-భాస్వర-ధామ-లోచన-గోచరమ్
కిం కిమిత్యతి-విస్మితే మయి పశ్యతీహ సమాగతామ్ ।
కాల-కున్తల-భార-నిర్జిత-నీల-మేఘ-కులాం పురః
చక్ర-రాజ-నివాసినీం త్రిపురేశ్వరీమవలోకయే ॥ ౧॥
॥ ఏ॥
ఏక-దన్త-షడాననాదిభిరావృతాం జగదీశ్వరీమ్
ఏనసాం పరి-పన్థినిమహమేక-భక్తి-మదర్చితామ్ ।
ఏక-హీన-శతేషు జన్మసు సఞ్చితాత్ సుకృతాదిమామ్
చక్ర-రాజ-నివాసినీం త్రిపురేశ్వరీమవలోకయే ॥ ౨॥
॥ ఈ॥
ఈదృశీతి చ వేద-కున్తల-వాగ్భిరప్య నిరూపితామ్
ఈశ-పఙ్జజ-నాభ-సృష్టి-కృదాది-వన్ద్య-పదామ్బుజామ్ ।
ఈక్షణాన్త-నిరీక్షణేన మదిష్టదాం పురతోఽధునా
చక్ర-రాజ-నివాసినీం త్రిపురేశ్వరీమవలోకయే ॥ ౩॥
॥ ల॥
లక్షణోజ్జవల-హార-శోభి-పయోధర-ద్వయ-కైతవాత్
లీలయైవ దయా-రస-స్రవదుజ్జ్వలత్-కలశాన్వితామ్ ।
లాక్షయాఙ్కిత-పాదపాతి-మిలిన్ద-సన్తతిమగ్రతః,
చక్ర-రాజ-నివాసినీం త్రిపురేశ్వరీమవలోకయే ॥ ౪॥
॥ హ్రీం॥
హ్రీమితి ప్రతి-వాసరం జప-సుస్థిరోఽహముదారయా
యోగి-మార్గ-నిరూఢయైక్య-సుభావనాం గతయా ధియా ।
వత్స ! హర్షమవాప్త-వత్యహమిత్యుదార-గిరం పురః
చక్ర-రాజ-నివాసినీం త్రిపురేశ్వరీమవలోకయే ॥ ౫॥
॥ హ॥
హంస-వృన్దమలక్తకారుణ-పాద-పఙ్కజ-నుపుర-
క్వాణ-మోహితమాదరాదను-ధావితం మృదు శృణ్వతీమ్ ।
హంస-మన్త్ర-మహార్థ-తత్త్వ-మయీం పురో మమ భాగ్యతః
చక్ర-రాజ-నివాసినీం త్రిపురేశ్వరీమవలోకయే ॥ ౬॥
॥ స॥
సఙ్గతం జలమభ్ర-వృన్ద-సముద్భవం ధరణీ- ధరాద్
ధారయా వహదఞ్జసా భ్రమమాప్య సైకత-నిర్గతమ్ ।
ఏవమాది-మహేన్ద్ర-జాల-సుకోవిదాం పురతోఽధునా
చక్ర-రాజ-నివాసినీం త్రిపురేశ్వరీమవలోకయే ॥ ౭॥
॥ క॥
కమ్బు- సున్దర-కన్ధరాం కచ-వృన్ద-నిర్జిత-వారిదామ్
కణ్ఠ-దేశ-లసత్ -సుమఙ్గల-హేమ-సూత్ర-విరాజితామ్ ।
కాది-మన్త్రముపాసతాం సకలేష్టదాం మమ సన్నిధౌ,
చక్ర-రాజ-నివాసినీం త్రిపురేశ్వరీమహమాశ్రయే ॥ ౮॥
॥ హ॥
హస్త-పద్మ-లసత్-త్రిఖణ్డ-సముద్రికామహమద్రిజామ్
హస్తి-కృత్తి-పరీత-కార్ముక-వల్లరీ-సమ-చిల్లికామ్ ।
హర్యజ-స్తుత-వైభవాం భవ-కామినీం మమ భాగ్యతః
చక్ర-రాజ-నివాసినీం త్రిపురేశ్వరీమహమాశ్రయే ॥ ౯॥
॥ ల॥
లక్షణోల్లసదఙ్గ-కాన్తి-ఝరీ-నిరాకృత-విద్యుతమ్
లాస్య-లోల-సువర్ణ-కుణ్డల-మణ్డితాం జగదమ్బికామ్ ।
లీలయాఽఖిల-సృష్టి-పాలన-కర్షణాది-వితన్వతీమ్
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౦॥
॥ హ్రీం॥
హ్రీంమితి త్రిపురా-మను-స్థిర-చేతసా బహుధాఽర్చితామ్
హాది-మన్త్ర-మహామ్బు-జాత-విరాజమాన-సుహంసికామ్ ।
హేమ-కుమ్భ-ఘన-స్తనాం చల-లోల-మౌక్తిక-భూషణామ్
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౧॥
॥ స॥
సర్వ-లోక-నమస్కృతాం జిత-శర్వరీ-రమణాననామ్
శరవ-దేవ-మనః - ప్రియాం నవ-యౌవనోన్మద-గర్వితామ్ ।
సర్వ-మఙ్గల-విగ్రహాం మమ పూర్వ-జన్మ-తపో-బలాత్
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౨॥
॥ క॥
కన్ద-మూల-ఫలాశిభిర్బహు-యోగిభిశ్చ గవేషితామ్
కున్ద-సున్దర-దన్త-పంక్తి-విరాజితామపరాజితామ్ ।
కన్దమాగమ-వీరూధాం సుర-సున్దరీభిరిహాగతామ్
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౩॥
॥ ల॥
ల-త్రయాఙ్కిత-మన్త్ర-రాట్-సమలంకృతాం జగదమ్బికామ్
లోల-నీల-సుకున్తలావలి-నిర్జితాలి-కదమ్బకామ్ ।
లోభ-మోహ-విదారణీం కరుణా-మయీమరుణాం శివామ్
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౪॥
॥ హ్రీం॥
హ్రీం-పరాఖ్య-మహా-మనోరధి-దేవతాం భువనేశ్వరీమ్
హృత్-సరోజ-నివాసినీం హర-వల్లభాం బహు-రూపిణీమ్ ।
హార-కుణ్డల-నూపురాదిభిరన్వితాం పురతోఽధునా
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౫॥
॥ శ్రీం॥
శ్రీం సు-పఞ్చ-దశాక్షరీమపి షోడషాక్షర-రూపిణీమ్
శ్రీ-సుధార్ణవ-మధ్య-శోభి-సరోజ-కానన-చన్ద్నికామ్ ।
శ్రీగుహ-స్తుత-వైభవాం పర-దేవతాం మమ సన్నిధౌ
చక్ర-రాజ-నివాసినీం త్రిపురేశ్వరీమహమాశ్రయే ॥ ౧౬॥
॥ ఇతి శ్రీత్రిపురసున్దరీ సాన్నిధ్యస్తవ సమ్పూర్ణా ॥
Comments
Post a Comment